ന്യൂഡല്‍ഹി: ഐസിഐസിഐ ബാങ്ക് മുന്‍ മേധാവി ചന്ദാ കൊച്ചാറിനെതിരെ സിബിഐ കേസെടുത്തു. വീഡിയോകോണ്‍ ഗ്രൂപ്പുമായി ബന്ധപ്പെട്ട അനധികൃത ഇടപാടിലാണ് കേസ്. കേസുമായി ബന്ധപ്പെട്ട് മുംബൈ, ഔറംഗാബാദ് എന്നിവിടങ്ങളിലായി 4 സ്ഥലത്ത് സിബിഐ റെയ്ഡ് നടത്തി.
ഐസിഐസിഐ മുന്‍ മേധാവി ചന്ദ കൊച്ചാര്‍, ഭര്‍ത്താവ് ദീപക് കൊച്ചാര്‍, വീഡിയോകോണ്‍ ഗ്രൂപ്പ് മേധാവി വേണുഗോപാല്‍ ദൂത് എന്നിവര്‍ക്ക്‌ എതിരെയാണ് എഫ്‌ഐആര്‍ രജിസ്റ്റര്‍ ചെയ്തത്. ബാങ്ക് മേധാവിയായിരിക്കെ കൊച്ചാര്‍ 3250കോടി രൂപ അനുവദിച്ചത് ബാങ്കിന്‍റെ ചട്ടങ്ങള്‍ക്ക് ക്രമവിരുദ്ധമാണെന്നും ഭര്‍ത്താവുമായി ചേര്‍ന്നുള്ള ഇടപാടാണ് വായ്പക്ക് പിന്നിലെന്നും ആരോപണം ഉയര്‍ന്നിരുന്നു. വിവാദത്തിന്‍റെ പശ്ചാത്തലത്തില്‍ കഴിഞ്ഞ ഒക്ടോബര്‍ കൊച്ചാര്‍ രാജിവെച്ചിരുന്നു.
