തിരുവനന്തപുരം: ശബരിമല വിഷയത്തെ ചൊല്ലിയുള്ള പ്രതിപക്ഷ പ്രതിഷേധത്തില് രണ്ടാം ദിവസവും നിയമസഭ പ്രക്ഷുബ്ധം. സഭ നടപടികളിലേക്ക് കടന്നപ്പോള് ചോദ്യോത്തര വേള നിര്ത്തിവച്ച് ശബരിമല വിഷയവുമായി ബന്ധപ്പെട്ട അടിയന്തിര പ്രമേയം ചര്ച്ചചെയ്യണമെന്ന് പ്രതിപക്ഷം ആവശ്യപ്പെട്ടു.
ചോദ്യോത്തരവേള റദ്ദാക്കിയ സ്പീക്കര് മറ്റ് നടപടികളിലേക്ക് കടന്നു. തുടര്ന്ന് ശൂന്യവേളയും സബ്മിഷനും റദ്ദാക്കി സഭ ഇന്നത്തേക്ക് പിരിഞ്ഞതായി സ്പീക്കര് പി ശ്രീരാമകൃഷ്ണന് അറിയിച്ചു. അതേസമയം, തുടര്ച്ചയായി ചോദ്യോത്തരവേള തടസപ്പെടുത്തിയാല് ചെയറിന് തുടര്നടപടികള് സ്വീകരിക്കേണ്ടി വരുമെന്ന് സ്പീക്കര് മുന്നറിയിപ്പ് നല്കി.
ചോദ്യോത്തരവേളയില് പ്രതിപക്ഷ അംഗങ്ങള് സഭയില് മുദ്രാവാക്യം വിളിച്ചു. പ്ലക്കാര്ഡും ബാനറുകളുമായി അംഗങ്ങള് നടുത്തളത്തിലിറങ്ങി. ചോദ്യങ്ങള്ക്കുള്ള മറുപടികള് വായിക്കാതെ മന്ത്രിമാര് മേശപ്പുറത്ത് വച്ചു. ചോദ്യങ്ങള് ചോദിക്കുന്നില്ലെന്ന് മിക്ക പ്രതിപക്ഷ എംഎല്എമാരും അറിയച്ചതോടെ ആ മറുപടികളെല്ലാം സ്പീക്കര് ഒഴിവാക്കി.