ലണ്ടന്: ബ്രിട്ടണിലെ എലിസബത്ത് രാജ്ഞി (96) അന്തരിച്ചു. ബ്രിട്ടീഷ് രാജ്ഞിയുടെ വേനല്ക്കാല വസതിയായ സ്കോട്ട്ലന്ഡിലെ ബാല്മൊറല് കൊട്ടാരത്തിലായിരുന്നു അന്ത്യം. കഴിഞ്ഞ വര്ഷം ഒക്ടോബര് മുതല് ആരോഗ്യ പ്രശ്നങ്ങള് അവരെ അലട്ടിയിരുന്നു. ഇന്ന് രാവിലെയാണ് വിദഗ്ദ്ധ പരിശോധനയ്ക്ക് ശേഷം അവരുടെ ആരോഗ്യ നിലയില് ഡോക്ടര്മാര് ആശങ്ക അറിയിച്ചത്. പിന്നാലെ മരണത്തിന് കീഴടങ്ങുകയായിരുന്നു.
ലോകത്ത് രാജവാഴ്ചയില് കൂടുതല്കാലം അധികാരത്തിലിരുന്ന രണ്ടാമത്തെ വ്യക്തിയെന്ന നേട്ടം ജൂണില് രാജ്ഞി കരസ്ഥമാക്കിയിരുന്നു. 1926 ഏപ്രില് 21-ന് ജോര്ജ് ആറാമന്റെ (ഡ്യൂക്ക് ഓഫ് യോര്ക്ക്) യും എലിസബത്ത് രാജ്ഞി (ഡച്ചസ് ഓഫ് യോര്ക്ക്) യുടെയും മകളായാണ് ജനനം.
കേരളവിഷൻ വാർത്തകൾ ഉടനടി നിങ്ങളുടെ മൊബൈലിൽ സൗജന്യമായി ലഭിക്കാൻ താഴെ കാണുന്ന ചുവന്ന ലിങ്കിൽ ക്ലിക്ക് ചെയ്യുക:
https://chat.whatsapp.com/HOQ5esXFP6sK82lAIwnJE0
എലിസബത്ത് അലക്സാന്ദ്ര മേരി വിന്ഡ്സര് എന്നായിരുന്നു പേര്. ജോര്ജ് ആറാമന്റെ പിതാവും രാജാവുമായിരുന്ന ജോര്ജ് അഞ്ചാമന്റെ ഭരണകാലത്തായിരുന്നു എലിസബത്തിന്റെ ജനനം.ബ്രിട്ടീഷ് കിരീടത്തിലേക്കുള്ള പിന്തുടര്ച്ചാവകാശത്തില് അമ്മാവന് എഡ്വേഡിനും പിതാവിനും പിന്നില് മൂന്നാമതായിരുന്നു എലിസബത്തിന്റെ സ്ഥാനം. ജോര്ജ് അഞ്ചാമന്റെ മരണത്തിന് പിന്നാലെ എഡ്വേഡ് രാജാവ് ആയെങ്കിലും വിവാഹമോചനവും അത് സംബന്ധിച്ച ഭരണഘടനാ പ്രതിസന്ധിക്കും പിന്നാലെ എഡ്വേഡ് രാജിവെച്ചു. തുടര്ന്ന് എലിസബത്തിന്റെ പിതാവ് ജോര്ജ് ആറാമന് ബ്രിട്ടന്റെ സിംഹാസനത്തിലെത്തി. അദ്ദേഹത്തിന്റെ മരണത്തിന് പിന്നാലെ മൂത്തമകളായ എലിസബത്ത് അധികാരത്തിലെത്തി.