കൊച്ചി:വധഗൂഢാലോചന കേസില് നടി മഞ്ജു വാര്യരുടെ മൊഴി രേഖപ്പെടുത്തി.കൊച്ചിയിലെ സ്വകാര്യ ഹോട്ടലില് വെച്ചാണ് ക്രൈംബ്രാഞ്ച് മൊഴിയെടുത്തത്. മൂന്നു മണിക്കൂറോളം നീണ്ട മൊഴിയെടുക്കലില് ഫോണ് സന്ദേശങ്ങള് കേന്ദ്രീകരിച്ചായിരുന്നു കൂടുതല് ചോദ്യങ്ങളും.
ഡിജിറ്റല് തെളിവുകളുടെ അടിസ്ഥാനത്തിലായിരുന്നു മൊഴിയെടുപ്പ്. ദിലീപിന്റെ ഫോണില് നിന്നു വീണ്ടെടുത്ത ചാറ്റുകളെക്കുറിച്ചും ഓഡിയോ സന്ദേശങ്ങളെക്കുറിച്ചും മഞ്ജുവിനോട് അന്വേഷണ സംഘം ചോദിച്ചറിഞ്ഞതായും സൂചനകളുണ്ട്.
വധഗൂഢാലോചന കേസില് തുടരന്വേഷണത്തിനായി കോടതി 40 ദിവസം ദീര്ഘിപ്പിച്ച് നല്കിയിരുന്നു. കാവ്യാ മാധവന്, നടന് ദിലീപിന്റെ അഭിഭാഷകര്, ദിലീപിന്റെ ബന്ധുക്കള് എന്നിവരെയെല്ലാം ഇനി ചോദ്യം ചെയ്യേണ്ടതുണ്ടെന്ന വിലയിരുത്തലിലാണ് അന്വേഷണ സംഘം. ദിലീപ് ഫോണില് നിന്ന് നീക്കിയ വാട്സാപ്പ് ചാറ്റുകളിലുള്ളവരെയും ചോദ്യം ചെയ്യാനൊരുങ്ങുന്നുണ്ട്.
കഴിഞ്ഞദിവസം നടന്ന അന്വേഷണ ഉദ്യോഗസ്ഥരുടെ ഉന്നതതല യോഗത്തിലാണ് വീണ്ടും മഞ്ജുവിന്റെ മൊഴിയെടുക്കാനുള്ള തീരുമാനമെടുത്തത്. നടിയെ ആക്രമിച്ച കേസിന്റെ തുടരന്വേഷണവുമായി ബന്ധപ്പെട്ട് നേരത്തെയും മഞ്ജു വാര്യരുടെ മൊഴി രേഖപ്പെടുത്തിയിരുന്നു.