ന്യൂഡൽഹി:രാജ്യത്ത് 5ജി സേവനം അവതരിപ്പിക്കുന്നതിനെതിരെ രംഗത്തെത്തിയിരിക്കുകയാണ് ബോളിവുഡ് നടി ജൂഹി ചൗള. ഡൽഹി ഹൈക്കോടതിയിൽ ജൂഹി ചൗള ഹർജി നൽകിയിട്ടുണ്ട്.
“സാങ്കേതിക പുരോഗതി ഉറപ്പ് വരുത്തുന്നതിന് വിവിധ സേവനങ്ങള്‍ അവതരിപ്പിക്കുന്നതിന് ഞങ്ങള്‍ എതിരല്ല. ഇന്ന് വയര്‍ലെസ്സ് കമ്യൂണിക്കേഷനിലുള്‍പ്പടെ നൂതനമായ ഉപകരണങ്ങളാണ് നാം ഉപയോഗിക്കുന്നത്.
അതേസമയം, വയര്‍ലെസ്സ് സാങ്കേതികവിദ്യ സൃഷ്ടിക്കുന്ന ആരോഗ്യപ്രശ്നങ്ങളെ കുറിച്ച്‌ കാര്യമായ പഠനങ്ങള്‍ നടന്നിട്ടില്ല. “വയര്‍ലെസ്സ് സാങ്കേതികവിദ്യ ആരോഗ്യത്തിന് ഹാനികരമാണെന്നാണ് പൊതുവിലുള്ള വിലയിരുത്തലെന്ന് ജൂഹി ചൗള പറഞ്ഞു.
5ജി സേവനം രാജ്യത്ത് അവതരിപ്പിക്കുന്നതിന് മുമ്ബ് അത് മനുഷ്യര്‍ക്കും മറ്റ് ജീവജാലങ്ങള്‍ക്കും എത്രത്തോളം ഹാനികരമാണെന്ന പഠനം നടത്തണമെന്നാണ് ആവശ്യമെന്ന് ജൂഹി ചൗളയുടെ വക്താവ് പ്രതികരിച്ചു . മൊബൈല്‍ സെല്‍ ടവറുകളിലൂടെയുണ്ടാവുന്ന റേഡിയേഷനെ കുറിച്ച്‌ സ്വകാര്യമേഖലയുടെ പങ്കാളിത്തമില്ലാതെ പഠനം നടത്താന്‍ കോടതി നിര്‍ദേശിക്കണമെന്ന് ഹരജിയില്‍ ആവശ്യപ്പെട്ടിട്ടുണ്ടെന്നും ജൂഹി ചൗള കൂട്ടിച്ചേര്‍ത്തു .
