ക്വാലാലംപൂര്‍: വിവാഹത്തിന് മുന്‍പായി ശരീര സൗന്ദര്യം വര്‍ദ്ധിപ്പിക്കാന്‍ ലൈപോസക്ഷന് വിധേയയായ പെണ്‍കുട്ടി മരിച്ചു. കൊക്കോ സ്യൂ ഷിംഗ് എന്ന 23കാരിയാണ് ചികിത്സയ്ക്കിടെ മരിച്ചത്. പൊലീസ് നടത്തിയ പ്രാഥമിക അന്വേഷണത്തില്‍ യുവതി ചികിത്സയ്‌ക്കായി തെരഞ്ഞെടുത്ത ബ്യൂട്ടി സലൂണിന് ലൈപോസക്ഷന് നടത്താനുള്ള ലൈസന്‍സ് ഇല്ലെന്ന് വ്യക്തമായി. ശരീരത്തില്‍ നിന്നും കൊഴുപ്പ് നീക്കം ചെയ്യുന്ന രീതിയാണ് ലൈപോസക്ഷന്. പെണ്‍കുട്ടിയുടെ മരണകാരണം എന്താണെന്ന് ഇതുവരെ വ്യക്തമായില്ലെന്നും ബ്യൂട്ടി സലൂണിന്റെ ഉടമകളായ സ്‌ത്രീയേയും മകളെയും കസ്‌റ്റഡിയിലെടുത്തതായും പൊലീസ് പറഞ്ഞു.കൈകളിലെ കൊഴുപ്പ് നീക്കം ചെയ്യാനായി സംഭവദിവസം യുവതി സലൂണിലെത്തി. ബോധം കെടാനുള്ള മരുന്ന് നല്‍കിയതിന് പിന്നാലെ ശാരീരിക പ്രശ്‌നങ്ങള്‍ പ്രകടിപ്പിച്ചു. ഒരു മണിക്കൂര്‍ കഴിഞ്ഞതോടെ ഹൃദയമിടിപ്പ് നിലച്ചു. ഉടന്‍ തന്നെ ആശുപത്രിയില്‍ എത്തിച്ചെങ്കിലും വൈകിട്ടോടെ യുവതിയുടെ മരണം സംഭവിച്ചു.2014ല്‍ നടന്ന ഏഷ്യന്‍ മോഡലിംഗ് മത്സരത്തില്‍ കൊക്കോ സ്യൂ സി ഷിങ് ഒന്നാമത് എത്തിയിരുന്നു.
