ലണ്ടന്: മാര്ച്ചില് പുറത്തിറക്കിയ സാംസങ്ങ് ഗ്യാലക്സി എസ് 10ന്റെ മുന്നിലെ ഇന്-സ്ക്രീന് ഫിംഗര് പ്രിന്റ് സെന്സറില് ആരുടെ വിരല് വച്ചാലും ഫോണ് തുറക്കപ്പെടുന്നുവെന്ന് പരാതി. ഒരു ബ്രിട്ടീഷ് യുവതിയുടെ ഫോണ് ഇത്തരത്തില് അവരുടെ ഭര്ത്താവിനും തുറക്കാന് സാധിക്കുന്നു എന്നാണ് ബിബിസി റിപ്പോര്ട്ട് ചെയ്യുന്നത്.
ബ്രിട്ടീഷ് പൗരമായ ലിസ നീല്സണ് ആണ് ആദ്യമായി ഈ പ്രശ്നം അനുഭവിച്ചത്. ഇ-ബേയില് നിന്നും പുതിയ സ്ക്രീന് പ്രൊട്ടക്ടര് വാങ്ങി ഫോണില് ഇട്ടപ്പോഴാണ് ആദ്യമായി ഈ പ്രശ്നം അവര് കണ്ടത്. കവര് ഇട്ടപ്പോള് ഭര്ത്താവിന്റെ വിരലുകള് തട്ടി ഫോണ് പലവട്ടം അണ്ലോക്ക് ആയതായി ഇവര് പറയുന്നു. ഇത് മറ്റൊരു ബന്ധുവിന്റെ ഫോണിലും സംഭവിച്ചുവെന്നാണ് ഇവര് പറയുന്നത്.
എസ് 10 പുറത്തിറക്കുന്ന വേളയില് ഈ ഫോണിലെ ഏറ്റവും വിപ്ലവകരമായ പ്രത്യേകത എന്നാണ് സാംസങ്ങ് ഫിംഗര് പ്രിന്റ് സെന്സറിനെ വിശേഷിപ്പിച്ചത്. എന്നാല് ഫിംഗര് പ്രിന്റ് സെന്സറിന്റെ സോഫ്റ്റ്വെയറില് സംഭവിച്ച പാളിച്ചകളാണ് ഇപ്പോഴത്തെ പ്രശ്നത്തിന് കാരണം എന്നാണ് റിപ്പോര്ട്ട്. ഇത് പരിഹരിക്കാന് ഉടന് തന്നെ ഒരു സോഫ്റ്റ്വെയര് അപ്ഡേറ്റ് നല്കാന് സാംസങ്ങ് തയ്യാറാകുമെന്നാണ് റിപ്പോര്ട്ടുകള്. ഇപ്പോള് സംഭവിച്ച തകരാര് സംബന്ധിച്ചുള്ള വിവരങ്ങള് ശേഖരിച്ചുവെന്നും ഇതിന് പരിഹാരം കാണുമെന്നുമാണ് സാംസങ്ങ് പറയുന്നതെന്ന് ബിബിസി റിപ്പോര്ട്ട് ചെയ്യുന്നു. അതേ സമയം പുതിയ സോഫ്റ്റ്വെയര് അപ്ഡേറ്റ് വരുന്നതുവരെ ഫോണിന്റെ ഫിംഗര്പ്രിന്റ് സെന്സര് ഓഫ് ചെയ്തിടാന് ചില ടെക് ഉപദേശകര് ഉപയോക്താക്കളോട് പറയുന്നു.