കൊച്ചി: പനമ്പള്ളിനഗര്‍ വാക്ക്‌വേ ക്ലബും ഈസ്റ്റീയും ചേര്‍ന്ന് ഓണാഘോഷം നടത്തി. പനമ്പള്ളി നഗര്‍ പാര്‍ക്കില്‍ നടന്ന പരിപാടിയുടെ ഉദ്ഘാടനം കൊച്ചി കോര്‍പ്പറേഷന്‍ കൗണ്‍സിലര്‍ ആന്റണി പൈനുതറ നിര്‍വഹിച്ചു. പുഴകളും ഭൂപ്രകൃതിയെയും സംരക്ഷിക്കാനുള്ള ഉത്തരവാദിത്വം ഈ ഓണദിനത്തില്‍ ഏറ്റെടുക്കണമെന്ന് അദ്ദേഹം പറഞ്ഞു. ഓണാഘോഷത്തോടനുബന്ധിച്ച് ഷേഡ്‌സ് ഓഫ് എക്സ്റ്റസി സംഗീതവിരുന്ന് ഒരുക്കി.
വാക്ക് വേ ക്ലബിന്റെ ഈ കൊല്ലത്തെ 6-ാമത്തെ പരിപാടിയാണ് ഇത്. കഴിഞ്ഞ വര്‍ഷം പ്രളയം കാരണം പരിപാടി നടത്താന്‍ കഴിഞ്ഞില്ല. ഈ വര്‍ഷത്തെ ഓണാഘോഷപരിപാടിയുടെ പ്രത്യേകത സംഗീതവിരുന്നാണ്. പനമ്പള്ളിനഗര്‍ പ്രദേശത്തുള്ള കലാകാരന്മാര്‍ക്ക് ഈ പരിപാടിയിലൂടെ അവസരമൊരുക്കാന്‍ കഴിഞ്ഞുവെന്ന് ഈസ്റ്റേണ്‍ മാര്‍ക്കറ്റിങ് ഹെഡ് ബിജു പറഞ്ഞു.
ചടങ്ങില്‍ വാക്ക് വേ ക്ലബ് പ്രസിഡന്റ് പോള്‍ പട്ടത്തില്‍ അധ്യക്ഷനായി. കൗണ്‍സിലര്‍ ഫ്രാന്‍സിസ്, കോര്‍പ്പറേഷന്‍ പ്രതിപക്ഷനേതാവ് കെ ജെ ആന്റണി, സെക്രട്ടറി സത്യജിത്ത് എന്നിവര്‍ പങ്കെടുത്തു.
