തിരുവനന്തപുരം: മാധ്യമപ്രവര്ത്തകന് കെഎം ബഷീറിനെ വാഹനമിടിച്ച് കൊലപ്പെടുത്തിയ കേസിലെ പ്രതി ശ്രീറാം വെങ്കിട്ടരാമനെ സര്വ്വീസില് തിരിച്ചെടുക്കാന് ശുപാര്ശ. ചീഫ് സെക്രട്ടറി ടോം തോമസ് അധ്യക്ഷനായ സമിതിയാണ് ശ്രീറാമിനെ സര്വ്വീസില് തിരിച്ചെടുക്കാന് മുഖ്യമന്ത്രിക്ക് ശുപാര്ശ നല്കിയത്.സസ്പെന്ഷന് കാലാവധി ആറ് മാസം പിന്നിട്ട സാഹചര്യത്തിലാണ് ശ്രീറാമിനെ തിരിച്ചെടുക്കാന് ശുപാര്ശ ചെയ്തിരിക്കുന്നത്.
എന്നാല് കേസില് ഇതുവരെ പോലീസ് കുറ്റപത്രം സമര്പ്പിച്ചിട്ടില്ല. കുറ്റപത്രം സമര്പ്പിച്ചിരുന്നുവെങ്കില് ചട്ടപ്രകാരം സസ്പെന്ഷന് റദ്ദാക്കാന് സാധിക്കുമായിരുന്നില്ല.
2019 ഓഗസ്റ്റ് മൂന്നാം തീയതിയാണ് തിരുവനന്തപുരം മ്യൂസിയം ജംഗ്ഷന് സമീപം വച്ച് ശ്രീറാം വെങ്കിട്ടരാമന് ഓടിച്ച കാറിടിച്ച് സിറാജ് ദിനപത്രത്തിന്റെ തിരുവനന്തപുരം ബ്യൂറോ ചീഫായിരുന്ന കെഎം ബഷീര് കൊല്ലപ്പെടുന്നത്. അന്നു സര്വ്വേ ഡയറക്ടറായിരുന്ന ശ്രീറാമിനെ സര്ക്കാര് സര്വ്വീസില് നിന്നും സസ്പെന്ഡ് ചെയ്തിരുന്നു.