ന്യൂഡല്ഹി: രാജ്യത്തെ ഏറ്റവും വേഗമേറിയ ട്രെയിന് വന്ദേഭാരത് എക്സ്പ്രസ് (ട്രെയിന് 18) പ്രധാനമന്ത്രി നരേന്ദ്രമോദി ഫ്ലാഗ് ഓഫ് ചെയ്തു. പുല്വാമയിലെ ഭീകരാക്രമണത്തില് നിരവധി സിആര്പിഎഫ് ജവാന്മാര് കൊല്ലപ്പെട്ട സാഹചര്യത്തില് ആഘോഷ പരിപാടികള് ചുരുക്കിയാണ് ഉദ്ഘാടനം നടത്തിയത്. റെയില്വെ മന്ത്രി പീയുഷ് ഗോയലും മറ്റ് റെയില്വെ ബോര്ഡ് ജീവനക്കാരും ചടങ്ങില് പങ്കെടുത്തു.
പ്രധാനമന്ത്രി നരേന്ദ്ര മോദിയുടെ സ്വപ്ന പദ്ധതിയായ മേക്ക് ഇന് ഇന്ത്യയുടെ ഭാഗമായാണ് ഈ ട്രെയിന് വികസിപ്പിച്ചെടുത്തത്. ഡല്ഹി റെയില്വെയില് നിന്നായിരുന്നു വന്ദേഭാരത് എക്സ്പ്രസിന്റെ കന്നിയോട്ടം. റായി ബറേലിയിലെ മോഡേണ് കോച്ച് ഫാക്ടറിയില് 97 കോടി രൂപ മുടക്കി 18 മാസം കൊണ്ടാണ് ട്രെയിന് നിര്മ്മിച്ചിരിക്കുന്നത്. ഡല്ഹി-വാരണാസി റൂട്ടിലാകും വന്ദേഭാരത് എക്സ്പ്രസ് സര്വീസ് നടത്തുക.
ഡല്ഹിയില് നിന്നും വാരണസിയിലേക്ക് ചെയര് കാറില് സഞ്ചരിക്കാന് 1,850 രൂപയാണ് യാത്രാ നിരക്ക്. ഇതേ റൂട്ടില് എക്സിക്യൂട്ടീവ് ക്ലാസില് യാത്ര ചെയ്യുന്നതിന് 3,520 രൂപ ടിക്കറ്റിന് മുടക്കേണ്ടിവരും. കാറ്ററിങ് സര്വീസ് ചാര്ജ് ഉള്പ്പടെയാണ് ഈ നിരക്കെന്ന് റെയില്വെ അധികൃതര് അറിയിച്ചു. മടക്ക യാത്രയ്ക്ക് ചെയര്കാറിന് 1,795 രൂപയും എക്സിക്യൂട്ടീവ് ക്ലാസില് 3,470 രൂപയുമാണ് ടിക്കറ്റ് നിരക്ക്. ഡല്ഹി – വാരണാസി റൂട്ടില് സഞ്ചരിക്കുന്നവര്ക്ക് പ്രഭാത ഭക്ഷണത്തിനും ഉച്ചഭക്ഷണത്തിനുമായി 399 രൂപ ഈടാക്കും. ചെയര്കാറില് സഞ്ചരിക്കുന്നവരില് നിന്ന് 344 രൂപയാവും ഈടാക്കുക.