തിരുവനന്തപുരം: സംസ്ഥാനത്ത് കനത്ത മഴയിലും വെള്ളപ്പൊക്കത്തിലും മണ്ണിടിച്ചിലിലും മരിച്ചവരുടെ എണ്ണം 76 ആയി. മലപ്പുറം ജില്ലയിലാണ് ഏറ്റവും കൂടുതല് ആളുകള് മരിച്ചിരിക്കുന്നത്. 19 പേരുടെ ജീവനാണ് മഴക്കെടുതിയില് പൊലിഞ്ഞത്. കോഴിക്കോട് 14, വയനാട് 10, കണ്ണൂര് അഞ്ച്, ഇടുക്കി നാല്, തൃശ്ശൂര് മൂന്ന്, ആലപ്പുഴ രണ്ട് എന്നിങ്ങനെയാണ് മറ്റ് ജില്ലകളിലെ മരണസംഖ്യ.
സംസ്ഥാനത്തടക്കം 1318 ദുരിതാശ്വാസ ക്യാമ്പുകളിലായി 46,400 കുടുംബങ്ങളിലെ 1,65,519 പേരാണ് കഴിയുന്നത്. കോഴിക്കോട് ജില്ലയിലാണ് ഏറ്റവും കൂടുതല് പേര് ക്യാമ്പുകളില് കഴിയുന്നത്. ശക്തമായ മഴയിലും കാറ്റിലും മലവെള്ളപ്പാച്ചിലിലും വെള്ളക്കെട്ടിലുംപെട്ട് സംസ്ഥാനത്താകെ 198 വീടുകള് പൂര്ണമായും 2303 വീടുകള് ഭാഗികമായും തകര്ന്നതായി റിപ്പോര്ട്ട്.
വയനാട്, കണ്ണൂര്, കാസര്കോട് ജില്ലകളില് ഇന്ന് റെഡ് അലര്ട്ടാണ്. എറണാകുളം മുതല് കോഴിക്കോട് വരെയുള്ള ജില്ലകളില് ഓറഞ്ച് അലര്ട്ടാണ്. തെക്കന് ജില്ലകളില് കനത്ത മഴക്ക് സാധ്യതയില്ല. ബംഗാള് ഉള്ക്കടലില് തിങ്കളാഴ്ചയോടെ പുതിയ ന്യൂനമര്ദ്ദം രൂപപ്പെടാന് സാധ്യതയുണ്ട്. എന്നാല് കേരളത്തില് മഴ ശക്തമാകില്ലെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.