തിരുവനന്തപുരം: സംസ്ഥാന സര്ക്കാരിന്റെ 2019 ലെ വനിതാരത്ന പുരസ്കാരങ്ങള് പ്രഖ്യാപിച്ചു. സാമൂഹ്യ സേവനത്തിനുള്ള വനിതാരത്ന പുരസ്കാരം മാനന്തവാടി വെമം അരമംഗലം വീട്ടില് സി.ഡി സരസ്വതിക്ക്. അരിവാള് രോഗത്തെ അതിജീവിച്ചുകൊണ്ട് അരിവാള് രോഗികള്ക്ക് വേണ്ടി നടത്തിയ പ്രവര്ത്തനങ്ങള്ക്കാണ് പുരസ്കാരം. കായികരംഗത്തെ പ്രതിഭയ്ക്കുള്ള പുരസ്കാരം പി.യു ചിത്രയ്ക്ക്. പ്രതികൂല സാഹചര്യങ്ങളെ അതിജീവിച്ച് ജീവിതവിജയം നേടിയ വനിതയ്ക്കുള്ള പുരസ്കാരം തിരുവനന്തപുരം കരമന കുഞ്ചാലുംമൂട് കല്പനയിലെ പി.പി രഹ്നാസിന്. സ്ത്രീകളുടേയും കുട്ടികളുടേയും ശാക്തീകരണത്തിനുള്ള പുരസ്കാരം പാലക്കാട് ലയണ്സ് റോഡ് ശരണ്യയിലെ ഡോ. പാര്വതി പി.ജി. വാര്യര്, വിദ്യാഭ്യാസ മേഖലയിലും ശാസ്ത്ര സാങ്കേതിക മേഖലയിലും വ്യക്തിമുദ്ര പതിപ്പിച്ച വനിതയ്ക്കുള്ള പുരസ്കാരം കണ്ണൂര് എച്ചിലാംവയല് വനജ്യോത്സ്നയിലെ ഡോ. വനജ എന്നിവര്ക്കാണ്. ഒരു ലക്ഷം രൂപയും ശില്പവും പ്രശസ്തിപത്രവുമടങ്ങുന്നതാണ് പുരസ്കാരം.
മാര്ച്ച് ഏഴിന് വൈകുന്നേരം 4 മണിക്ക് തിരുവനന്തപുരം നിശാഗന്ധി ഓഡിറ്റോറിയത്തില് സംഘടിപ്പിക്കുന്ന അന്താരാഷ്ട്ര വനിതാദിനാഘോഷം സംസ്ഥാനതല ഉദ്ഘാടനത്തോടനുബന്ധിച്ച് മുഖ്യമന്ത്രി പിണറായി വിജയന് പുരസ്കാരങ്ങള് വിതരണം ചെയ്യുമെന്നും മന്ത്രി കെ.കെ ശൈലജ അറിയിച്ചു.
കേരളത്തിൽ ഏറ്റവും കൂടുതൽ വായിക്കപ്പെടുന്ന വാട്സ്ആപ്പ് വാർത്തകൾ നിങ്ങൾക്ക് ലഭിക്കാൻ ക്ലിക്ക് ചെയ്യുക:
https://chat.whatsapp.com/GuudxtLhAiIG4uoIVbclOR