തിരുവനന്തപുരം: ലോക്സഭാ തെരഞ്ഞെടുപ്പിൽ കേരളത്തിൽ എൽഡിഎഫിന് തിരിച്ചടി നേരിടുമെന്ന് ടൈംസ് നൗ-വിഎംആര്‍ സര്‍വ്വേ. ശബരിമല വിഷയം യുഡിഎഫിന് നേട്ടമാകുമെന്നും ബിജെപി അക്കൗണ്ട് തുറക്കുമെന്നും സര്‍വ്വേ പ്രവചിക്കുന്നു.
യുഡിഎഫിന് 16, എൽഡിഎഫിന് 3., ബിജെപിക്ക് 1 എന്നിങ്ങനെയാണ് സര്‍വ്വേ പ്രവചനം.
2014 ൽ 41.98 ശതമാനം വോട്ട് ഷെയര്‍ നേടിയ യുഡിഎഫ് 45 ശതമാനത്തിലേക്ക് ഉയരും. ഇതോടൊപ്പം 40.12 ശതമാനം വോട്ട് ഷെയര്‍ നേടിയ എൽഡിഎഫ് 29.20 ലേക്ക് ഒതുങ്ങും. 10.57 ശതമാനം വോട്ട് ഷെയറിൽ നിന്ന് ബിജെപി 21.70 ലേക്ക് ഉയരുമെന്നും സര്‍വ്വേ വ്യക്തമാക്കുന്നു.
ജനുവരിയിൽ ടൈംസ് നൗ-വിഎംആര്‍ സര്‍വ്വേ നടത്തിയിരുന്നു. എന്നാൽ രാജ്യത്തെ രാഷ്ട്രീയ സാഹചര്യങ്ങളിലെ മാറ്റം കണക്കിലെടുത്താണ് വീണ്ടും സര്‍വ്വേ നടത്തിയത്. കേന്ദ്ര സര്‍ക്കാരിൻ്റെ ഇടക്കാല ബജറ്റ്, ബാലാകോട്ട് വ്യോമാക്രമണം എന്നീ വിഷയങ്ങളാണ് സര്‍വ്വേയിൽ നിര്‍ണായകമായത്. 16,931 പേര്‍ സര്‍വ്വേയിൽ പങ്കെടുത്തുവെന്ന് ടൈംസ് നൗ വ്യക്തമാക്കി.
