ന്യൂഡല്‍ഹി: 20 രൂപയുടെ നാണയമിറക്കാന്‍ കേന്ദ്ര ധനകാര്യ മന്ത്രാലയത്തിന്‍റെ തീരുമാനം. 12 കോണുകളുള്ള (dodecagon) രൂപത്തിലായിരിക്കും നാണയം. പന്ത്രണ്ടു വശങ്ങള്‍ ഉള്ള ബഹുഭുജരൂപത്തിലാണ് ഈ നാണയങ്ങള്‍ ഇറങ്ങുക. ഇതിന്‍റെ വ്യാസം 27 മില്ലിമീറ്ററും ഭാരം 8.54 ഗ്രാമും ആയിരിക്കും. 65% ചെമ്പ്, 15% സിങ്ക്, 20% നിക്കല്‍ തുടങ്ങിയവ ഉപയോഗിച്ചായിരിക്കും നാണയത്തിന്‍റെ ബാഹ്യവൃത്തം നിര്‍മ്മിക്കുന്നത്. ഉള്ളിലാകട്ടെ, 75% ചെമ്പ്, 20% സിങ്ക്, 5% നിക്കല്‍ എന്നിങ്ങനെയാണ് ലോഹങ്ങള്‍ ഉപയോഗിക്കുക. അശോകസ്തംഭം ഇതില്‍ ആലേഖനം ചെയ്തിരിക്കും. ഇതിനു മേല്‍ ഹിന്ദിയിലും ഇംഗ്ലീഷിലും ‘ഇന്ത്യ’ എന്നും എഴുത്തുണ്ടായിരിക്കും. 10 രൂപ നാണയം ഇറങ്ങി 10 വര്‍ഷം തികയുന്ന സമയത്താണ് പുതിയ 20 രൂപ നാണയമിറക്കാനുള്ള സർക്കാർ തീരുമാനം. നോട്ടുകളെ അപേക്ഷിച്ച് നാണയങ്ങൾ ദീർഘകാലം നിലനില്‍ക്കുമെന്ന വിലയിരുത്തലിലാണ് നാണയം പുറത്തിറക്കുന്നതെന്ന് റിസർവ് ബാങ്ക് വൃത്തങ്ങള്‍ അറിയിച്ചു
