ന്യൂഡൽഹി: പാക്കിസ്ഥാനെതിരായ പോരാട്ടത്തിൽനിന്നും ഇന്ത്യ പിന്നോട്ടില്ലെന്ന് പ്രധാനമന്ത്രി നരേന്ദ്ര മോദി. ഇന്ത്യയെ അസ്ഥിരപ്പെടുത്താനുള്ള നീക്കമാണ് പാക്കിസ്ഥാൻ നടത്തുന്നതെന്നും ബിജെപി പ്രവർത്തകരുമായുള്ള വീഡിയോ കോണ്ഫറൻസിൽ മോദി പറഞ്ഞു. രാജ്യ സുരക്ഷയാണ് പരമപ്രധാനമെന്നും ഇന്ത്യ ഒറ്റക്കെട്ടാണെന്നും ജനങ്ങൾ സർക്കാരിനെ വിശ്വസിക്കണമെന്നും പ്രധാനമന്ത്രി നരേന്ദ്ര മോദി. സൈന്യത്തിൽ പൂർണവിശ്വാസമുണ്ട്. ഏറ്റവും പ്രധാനപ്പെട്ടതു രാജ്യസുരക്ഷയാണ്. പിന്നോട്ടില്ല. ഇന്ത്യ ഒരുമിച്ചു ജീവിക്കും, ഒരുമിച്ചു വളരും, ഒരുമിച്ചു പോരാടും, ഒരുമിച്ചു ജയിക്കും– പ്രധാനമന്ത്രി പറഞ്ഞു. ഇന്ത്യയെ വിഭജിക്കാനാണ് പാക്കിസ്ഥാൻ ശ്രമം. അതിനാൽ സൈനികർക്ക് കർശന നിർദേശം നൽകിയിട്ടുണ്ടെന്നും മോദി പറഞ്ഞു. ഇന്ത്യയെ ലോകത്തിൽ മൂന്നാമത്തെ സാമ്പത്തിക ശക്തിയായി വളർത്തുകയാണ് ലക്ഷ്യം. എന്നാൽ രാജ്യപുരോഗതി തടയാനാണ് പാക്കിസ്ഥാൻ ശ്രമിക്കുന്നത്. ഈ നീക്കത്തെ ഒറ്റക്കെട്ടായി ഒരു മനസോടെ ചെറുത്ത് തോൽപ്പിക്കണമെന്നും മോദി കൂട്ടിച്ചേർത്തു.
