അമേരിക്കയിലെ മലയാളി മാധ്യമപ്രവര്‍ത്തകരുടെ കൂട്ടായ്മയായ ഇന്ത്യ പ്രസ് ക്ലബ് ഓഫ് നോര്‍ത്ത് അമേരിക്ക (ഐ.പി.സി.എന്‍.എ) മാധ്യമരംഗത്തെ സമഗ്രസംഭാവനകള്‍ക്ക് നല്‍കുന്ന മാധ്യമശ്രീ പുരസ്‌കാരത്തിന് ജോസി ജോസഫ് അര്‍ഹനായി.ഒരു ലക്ഷം രൂപയും, പ്രശംസാ ഫലകവും അടങ്ങുന്നതാണ് പുരസ്‌കാരം . മാതൃഭൂമി ചാനല്‍ ചീഫ് ഓഫ് ന്യൂസ് ഉണ്ണി ബാലകൃഷ്ണനാണ് മാധ്യമരത്‌ന പുരസ്‌കാരം. 50,000 രൂപയും പ്രശംസാഫലകവും ലഭിക്കും.
പുരസ്‌കാരങ്ങള്‍ ജനുവരി 13 ഞായറാഴ്ച വൈകീട്ട് 6 മണിക്ക് ബോള്‍ഗാട്ടി പാലസ് ഹോട്ടലില്‍ നടക്കുന്ന വര്‍ണാഭമായ ചടങ്ങില്‍ വെച്ച് മുഖ്യമന്ത്രി പിണറായി വിജയന്‍ വിതരണം ചെയ്യും. മുന്‍ മുഖ്യമന്ത്രി ഉമ്മന്‍ചാണ്ടി മുഖ്യാതിഥിയാകും.
കൂടാതെ മാധ്യമരംഗത്ത് വിവിധ മേഖലകളില്‍ മികവ് തെളിയിച്ച 9 പേര്‍ക്കും പുരസ്‌കാരങ്ങള്‍ പ്രഖ്യാപിച്ചു .
മികച്ച പത്രപ്രവര്‍ത്തകന്‍ – വി.എസ് രാജേഷ് – കേരള കൗമുദി(അച്ചടി) , പി.ആര്‍ സുനില്‍- ഏഷ്യാനെറ്റ് ന്യൂസ് (ദൃശ്യമാധ്യമം ) ,മികച്ച സംവാദകന്‍ – എന്‍.പി ചന്ദ്രശേഖരന്‍ (കൈരളി ടി.വി) , മികച്ച വാര്‍ത്ത അവതാരകന്‍ – അഭിലാഷ് മോഹനന്‍ (റിപ്പോര്‍ട്ടര്‍), മികച്ച അന്വേഷണാല്‍മക വാര്‍ത്ത- എം.നിസാര്‍ – (മാധ്യമം) , മികച്ച ഫോട്ടോഗ്രാഫര്‍ – അരവിന്ദ് വേണുഗോപാല്‍ (മലയാള മനോരമ) , മികച്ച ഫീച്ചര്‍ -എ എസ് ശ്രീകുമാര്‍ , മികച്ച യുവ മാധ്യമപ്രവര്‍ത്തകന്‍ – അഖില്‍ അശോക് , മനോരമ ഓണ്‍ലൈന്‍ . 25000 രൂപയും പ്രശംസാഫലകവും ആണ് ഇവര്‍ക്ക് ലഭിക്കുക.
ഡോ: ഡി. ബാബു പോള്‍ , കെ.എം റോയ് , തോമസ് ജേക്കബ് , അലക്‌സാണ്ടര്‍ സാം , ഡോ: എം.വി പിള്ള എന്നിവരടങ്ങുന്ന ജൂറിയാണ് പുരസ്‌ക്കാരജേതാക്കളെ തെരെഞ്ഞെടുത്തത്.
