മെല്ബണ് ബോക്സിങ് ഡേ ക്രിക്കറ്റ് ടെസ്റ്റില് പരമ്പര ലീഡ് നേടാന് അഞ്ചാം ദിനം ഇന്ത്യ. നാലാം ദിവസം കളി അവസാനിക്കുമ്പോള് എട്ട് വിക്കറ്റിന് 258 റണ്സ് എന്ന നിലയിലാണ് ഓസ്ട്രേലിയ. ബൗളര്മാരായ പാറ്റ് കമിന്സ്, നഥാന് ലിയോണ് എന്നിവരാണ് ക്രീസില്. ഒരുദിനം ശേഷിക്കെ 141 റണ്സാണ് ഓസ്ട്രേലിയക്ക് ജയിക്കാന് വേണ്ടത്.
മൂന്ന് വിക്കറ്റ് എടുത്ത രവീന്ദ്ര ജഡേജയാണ് ഇന്ത്യയ്ക്ക് വേണ്ടി മികച്ച ബൗളിങ് പ്രകടനം പുറത്തെടുത്തത്. പേസര്മാര് ജസ്പ്രീത് ബുംറ, മൊഹമ്മദ് ഷമി എന്നിവര് രണ്ട് വിക്കറ്റുകള് വീതം എടുത്തു.
ഓസ്ട്രേലിയയുടെ ബാറ്റിങ് നിരയില് തിളങ്ങിയത് ബൗളര് പാറ്റ് കമിന്സ് ആണ്. നേരത്തെ രണ്ട് ഇന്നിങ്സുകളിലായി 9 ഇന്ത്യന് വിക്കറ്റുകളും കമിന്സ് വീഴ്ത്തിയിരുന്നു. നാലാം ദിനം അവസാനിക്കുമ്പോള് പുറത്താകാതെ 61 റണ്സ് ആണ് കമിന്സ് എടുത്തത്.
നാല് ടെസ്റ്റ് മത്സരങ്ങളുടെ പരമ്പരയിലെ മൂന്നാം മത്സരമാണിത്. അഡ്ലെയ്ഡിലെ ആദ്യ ടെസ്റ്റില് ഇന്ത്യ ജയിച്ചപ്പോള് രണ്ടാം മത്സരത്തില് ഓസ്ട്രേലിയ ശക്തമായി തിരിച്ചെത്തി. പരമ്പരയില് ലീഡ് നേടാനുള്ള അവസരമാണ് ഇന്ത്യയ്ക്ക് മുന്നില് ഇപ്പോഴുള്ളത്.